في يوم ماشي في شوارع القاهرة
وقت الظهر .. و ما ادراك معني المشي سواء علي رجليك او في مواصلة او في عربيتك وقت الظهر في القاهرة ... كل سكان القاهرة طبعا فهمني .. المهم طبعا المود بتاعي مش حلو و قرفان .. لكن وقفت مع نفسي كده و قلت مهو مش معقولة اكره المكان اللي انا عايش فيه ... ده متبقاش عيشة .. طب احاول احسن المكان ده .. طب اذا مكنتش قادر احسن المكان بنفسي يبقي لازم لازم احب المكان ... لازم احب القاهرة علشان اقدر اعيش فيها .. طب احب فيها ايه .. سآلت نفسي طب و انا اعرف ايه في القاهرة غير مكان الشغل و البيت و الخروجات المعتاده .. يعني بعدي كده علي الطريق و انا مش واخد بالي منه .. خلاص يبقي علشان احب القاهرة لازم اعرفها و من هنا جه مشروع "القاهرة من تاني" .. قررت اني في يوم الاجازة كل اسبوع اروح ازور مكان في القاهرة .. ممكن المكان ده اكون زرته قبل كده و ممكن تكون اول زيارة .. المهم اعيد اكتشاف القاهرة
طب ابتدي منين؟ فكرت كده و قررت اخدها من فوق و ابتدي بقلعة صلاح الدين و مسجد محمد علي
بعد ما تقطع التذكره و تفوت من البوابة و تمشي شويه هايقابلك استديو علي اليمين .. في الاستديو ده ممكن تدفع عشرين جنيه و تتقمص الحالة التاريخية في زي محمد علي .. الخديوي اسماعيل .. خوفو .. كليوباترا .. ان شالله حتي نابليون كله موجود و كمان هتاخد صوره تعلقها في الصالون تخليدا للحظة التاريخية ده
شوفوا حتي
لا لا الست اللي في اخر صورة من اليمين تحت مش تاريخية خالص .. يمكن الراجل حطها تعبيرا عن تعانق الماضي بالحاضر !! ا
بعد ما مشيت شوية لقيت الجمع الغفير ده
ايه ده يا جماعة انا معزمتش حد .. و لا باين كده المشروع بتاعي اتلطش و لا حد فتن عليا .. مفيش حاجة تداري كده في البلد ده!!ا
قمت واخد بعضي ورحت رايح علي مسجد محمد علي
لقيت بقيت الجمهور مستنين جوه المسجد
لااا ده اصتقصاد بقي
السقف جوه المسجد تحفة
شوفوا اسماء الخلفاء الراشدين علي اركان قبة المسجد من الداخل
و ده بقي الساعة اللي خدها محمد علي هدية و ادي لويس فيليب ملك فرنسا المسلة اللي لسه واقفة في ميدان الكونكورد في باريس ... اصل البلد ده من زمان ملهاش اصحاب
فيه مسجد تاني في القلعة اقل شهرة هو مسجد الناصر محمد بن قلاوون
و ده واحده من مآذنه .. لاحظوا انها من طراز تاني (الطراز الايراني) غير بتاع مسجد محمد علي (الطراز التركي)ا
لا شرس .. و ده من ايه ده .. ده ميخوفش قطة
الحكومة بتاعتنا طبعا لازم تكييف الشعب امااال .. علشان كده زرعين في القلعة نبات الدخان
لا لا متفهموش غلط ده للفرجة بس ... يالا ادعولها بقي
جزء من منظر القاهرة من فوق
مسجد الرفاعي (يمين) و مسجد السلطان حسن (شمال) .. ايوه شاطرين اللي مرسوم علي الورقة ام مية
عارفين ايه ده؟
لا لا مش معقول يعني مفيش حد كده بيصوم رمضان
ميغركوش شكله ... الدهن في العتاقي برده :) ا
و ده بيشاور علي ايه ده .. ربنا يشفي
المهم انا قضيت يوم جميل استمتعت بيه و كسرت بيه روتين حياتي و سلام بقي
هناك ١٠ تعليقات:
:)
جميل اوى المشروع بتاعك ده "القاهرة من تانى " .. وحاطط جمبيها 1 ..يعنى ان شاء الله هيبأه فى 2 و 3 ..
يا ريت كلنا نعمل كده ..مش علشان نكتشف الحضارة ولا التاريخ ولا الكلام القلش ده كله ..لء ..علشان زى ما انت قلت بالظبط ..نحاول نحب البلد اللى احنا عايشين فيها ..واللى مبأش فيها حاجة تتحب
الصور فظيعة على فكرة ..حلوة جدا ما شاء الله :)
متشكر يا سمر
لازم الواحد يتكيف مع ظروفه ان كان مش قادر يغيرها
السلام عليكم
احلى حاجه ان الواحد يتقبل بلده
يعنى السياح بيجو يتفرجو على ام الدنيا مصر واحنا نادرا منشوف الاماكن الحلوه اللى فيها
مشكور على التصوير والصور
صورك بجد حلوة
كمان مشروعك جميل
أحييك على مصريتك
:)
القلعة رهيبة ......المبانى عليها جلال ووقار جامد اوى
اتصورت زمان وانا راكب الأسد بس الصورة ضاعت من عشرين سنة
سؤال عشان خاطرى
اسم مدونتك بالألمانى لانجزام ابير زيخر يعنى ايه
وميزو سوب
من الصابون ولا من الشوربة
اصلها تفرق
ازيك يا دانتي
اسم المدونة هو عبارة بالالمانية معناها اتقدم ببطء لكن بثقة و هي اتقالتي مرة لما كنت زهقان و مضايق لما الشغل اللي كنت بعمله مكانش ماشي بسرعة زي ما كنت عايز ... يعني علقت معايا و زي ما تقول اختها كده شعار في الحياة
اما الميزو سوب فهي من الشربة و تلاقي كلام عنها بتفصيل اكتر في البوست بتاع "ان فاتك الياباني مش هايرجع تاني"
في اللينك ده
http://langsamabersicher.blogspot.com/2008/03/blog-post_24.html
نورت المدونة :)
بجد جميل اوي بوست خامسه سياحه ده ,,,و انا اسفه اني مش باجي عشان مشغوله اوي حتي مشغوله عن المدونه بتاعتي
سلام
انا عملت الجولة دى مرة ولوحدى
فى اخر ايام دراستى من شدة حبى للتعليم مكنتش بحضر محاضارات ولا سكاشن وجيت فى يوم طلبت معايا اروح احضر محاضرة واول ما دخلت حسيت انى مخنوقة ما انا مش متعودة على الكلام الفاضى ده
روحت واخده بعضى وقولت اتفقد اهم المعالم ... واخدت بعضى وروحت قلعة صلاح الدين الايوبى مريت بكل الاماكن الىل مريت بيها وشرحتها بس بامانة مشوفتش الاستوديو ولا اخدت بالى منه .. المهم دخلت مسجد وفضلت اكتتتتتتب وانا مش عارفه اان بكتب ليه ولا ايه .. دخلت المتحف وفضلت اكتتتتتب الاجانب نفسهم كانوا بيبصوا عليا وكانى خبيرة جاية تعمل فحص للمكان والحمد لله اليوم انتهى والله لسه لحد النهارده عندى الدفتر اللى كنت مسجله فيه كل المعلومات وكل لما ابص فيه اضحك واقول ايييييه كانت ايام
تحياتى ليك واشكرك جد على الصور الجميله
و لا يهمك يا فيروز .. اهلا بيكي في اي وقت
نونو اقصد نورتي يا قطة في البلوج
فعلا احسن حاجة علشان نفضل نحب التعليم ان احنا منحضرش لا محاضرات و لا شكاشن .. طبعا و الا هانكره التعليم علي اللي بيتعلموا :) .. يييب
يمكن يكون الاستديو ده جديد .. يلا فرصتك جاتلك اه !!
إرسال تعليق