حكمت اليوم ................ و كل يوم

الوحدة مش ان ميكونش حواليك حد ....... الوحدة ان ميكونش في قلبك حد

Bye Bye Sun

My beloved Alex at sunset

الحلوة

الحلوة ده شفتها في قصر المنتزه بالاسكندرية فكنت لازم اصورها

من حديقة البلكونة

القاهرة من تاني م٢

المرة ده حبيت اروح مكان من زماااااااان مرحتوش مع اني بعدي كتير من قدامه
المكان ده هو المتحف المصري بميدان التحرير


واحد صاحبي كان نفسه يروح (لكن لغرض تاني سيتضح حالا) ... المهم السبت كان يوم مناسب .. اخدنا بعضنا و رحنا علي هناك
انا في حياتي متفتشتش و اتحقق من شخصيتي اد المرة ده .. علي الباب اللي يدخل علي الشارع اللي فيه باب المتحف الخارجي طلبوا مننا البطايق و مرينا في جهاز كشف المعادن و لو كان معاك شنطة هاتتفتش ... نفس الحكاية علي الباب الخارجي للمتحف بالاضافة للتفتيش الذاتي بطريقة "التحسيس" ... بعد كده تروح تدفع ٢ جنيه تمن التذكرة (هاتكون جنيه لو انت طالب مصري و هاتدفع ٤٠ جنيه لو انتي مش مصري .. و هي ده الميزه يمكن الوحيده اللي لقيتها كونك مصري) و علي باب المتحف يتكرر نفس السيناريو .. لكن للامانة نفس الكلام كان بيتم للاجانب حتي موضوع التحسيس ده !!!!. لكن المرة ده عصلجوا في موضوع الكاميرا وممنوع ممنوع التصوير ... اضطرينا نخرج تاني للامانات (مكنتوا قولتو كده من الاول) ... المهم دخلنا ... هيييييييه
انا و شريف بصينا لبعض مش مصدقين احنا دخلنا المتحف نفسه و لا المخزن!!!!!! ايه ده ايه الكركبة ده كلها ... قطع اثار مترمية في كل حته من غير اي اسلوب للعرض و احيانا من غير ورقة عليها التعريف بالاثر و احيانا ورقة مقطوعة زي ما تقولوا من كراس و مكتوب عليها بخط اليد (اه و الله حتي تلاقوها في القاعة بتاعة المرحوم توت عنخ امون) ...
في حاجات كده زي الفتارين تلاقي فيها يمكن ٥٠ او ٦٠ تمثال زي بعضهم الخالق الناطق كانك في بازار حتي انا شكيت يكونوا عرضينها للبيع .. حاجه كده غبا
المهم انا فهمت شريف كان عايز يروح المتحف ليه .. اصله لسه جاي من انجلترا و واحد معرفته كان في اجازة في مصر و جه شاف المتحف و كان هايعيط من اللي شافه ... لا لا مش من الانبهار بس لء كمان من الغيظ من طريقة عرض المتحف
المتحف كان زحمة جدا مليان افواج و كمان كان فيه طلبة اعتقد من فنون جميلة بيعملوا حاجات كده زي الحواه ... بكام ضربة قلم رصاص تلاقي الاثر اتنقلت صورة منه علي الورق .. انا بقيت ببص عليهم بانبهار و ده اكتر حاجه عجبتني.
كان فيه في الدور التاني قاعة للممياوات لكن كانت ليها تذكره دخول خاصة (١٠ جنيه للمصري) .. لكن احنا كانت نفسنا انسدت و هانحرق دمنا بفلوسنا .. بلاها
البوست مفهوش صور علشان ممنوع التصوير .. رغم اني ده ضايقني في الاول لكن بعد ما اتسدت نفسي قلت احسن مفيش حاجه تستاهل و لو اني كنت عايز اوثق "المهزله" ده؟
يكونش علشان كده منعين التصوير!!!! ١

Sunset

القاهرة من تاني م١

في يوم ماشي في شوارع القاهرة
وقت الظهر .. و ما ادراك معني المشي سواء علي رجليك او في مواصلة او في عربيتك وقت الظهر في القاهرة ... كل سكان القاهرة طبعا فهمني ..  المهم طبعا المود بتاعي مش حلو و قرفان .. لكن وقفت مع نفسي كده و قلت مهو مش معقولة اكره المكان اللي انا عايش فيه  ... ده متبقاش عيشة .. طب احاول احسن المكان ده .. طب اذا مكنتش قادر احسن المكان بنفسي يبقي لازم لازم احب المكان ... لازم احب القاهرة علشان اقدر اعيش فيها .. طب احب فيها ايه .. سآلت نفسي طب و انا اعرف ايه في القاهرة غير مكان الشغل و البيت و الخروجات المعتاده .. يعني بعدي كده علي الطريق و انا مش واخد بالي منه .. خلاص يبقي علشان احب القاهرة لازم اعرفها و من هنا جه مشروع "القاهرة من تاني" .. قررت اني في يوم الاجازة كل اسبوع اروح ازور مكان في القاهرة .. ممكن المكان ده اكون زرته قبل  كده و ممكن تكون اول زيارة .. المهم اعيد اكتشاف القاهرة
طب ابتدي منين؟ فكرت كده و قررت اخدها من فوق و ابتدي بقلعة صلاح الدين و مسجد محمد علي



بعد ما تقطع التذكره و تفوت من البوابة و تمشي شويه هايقابلك استديو علي اليمين .. في الاستديو ده ممكن تدفع عشرين جنيه و تتقمص الحالة التاريخية في زي محمد علي .. الخديوي اسماعيل .. خوفو .. كليوباترا .. ان شالله حتي نابليون كله موجود و كمان هتاخد صوره تعلقها في الصالون تخليدا للحظة التاريخية ده
شوفوا حتي

لا لا الست اللي في اخر صورة من اليمين تحت مش تاريخية خالص .. يمكن الراجل حطها تعبيرا عن تعانق الماضي بالحاضر !! ا

بعد ما مشيت شوية لقيت الجمع الغفير ده

ايه ده يا جماعة انا معزمتش حد .. و لا باين كده المشروع بتاعي اتلطش و لا حد فتن عليا .. مفيش حاجة تداري كده في البلد ده!!ا

قمت واخد بعضي ورحت رايح علي مسجد محمد علي






لقيت بقيت الجمهور مستنين جوه المسجد


لااا ده اصتقصاد بقي

السقف جوه المسجد تحفة
شوفوا اسماء الخلفاء الراشدين علي اركان قبة المسجد من الداخل




و ده بقي الساعة اللي خدها محمد علي هدية و ادي لويس فيليب ملك فرنسا المسلة اللي لسه واقفة في ميدان الكونكورد في باريس ... اصل البلد ده من زمان ملهاش اصحاب


فيه مسجد تاني في القلعة اقل شهرة هو مسجد الناصر محمد بن قلاوون
و ده واحده من مآذنه .. لاحظوا انها من طراز تاني (الطراز الايراني) غير بتاع مسجد محمد علي (الطراز التركي)ا




لا شرس .. و ده من ايه ده .. ده ميخوفش قطة

الحكومة بتاعتنا طبعا لازم تكييف الشعب امااال .. علشان كده زرعين في القلعة نبات الدخان

لا لا متفهموش غلط ده للفرجة بس ... يالا ادعولها بقي

جزء من منظر القاهرة من فوق
مسجد الرفاعي (يمين) و مسجد السلطان حسن (شمال) .. ايوه شاطرين اللي مرسوم علي الورقة ام مية




عارفين ايه ده؟


لا لا مش معقول يعني مفيش حد كده بيصوم رمضان

ميغركوش شكله ... الدهن في العتاقي برده :) ا

و ده بيشاور علي ايه ده .. ربنا يشفي


المهم انا قضيت يوم جميل استمتعت بيه و كسرت بيه روتين حياتي و سلام بقي

Home! Sweet Home!

بعد شعلقة في الهوا علي ارتفاع ١١٠٠٠ متر لمدة ١٤ ساعة و نصف جوة الطائرة ده




وصلت القاهرة اخيرا


في الطريق بعد ما خرجنا من طوكيو شفت المنظر ده


و ده بقي جبل فوجي .. اعلي جبال اليابان بارتفاع ٣٧٧٦ متر .. و من اسمه جه اسم الشركة اللي صنعت الكاميرا اللي انا صورته بيها

شوفتوا منظر الغروب من فوق .. ملاني بالشجن

الارض الخراب

صباح مشمس دافي .. سماء صافية 
الساعة ٨ و ربع 
الناس ابتدت تخرج من بيوتها .. العمال للمصانع .. الاطفال للمدارس .. يوم جديد .. امل جديد بغد افضل

لكن الغد ده مجاش .. ببساطة لان المدينة اتمسحت من علي وجه الارض في ثواني ... 
كل حاجه كانت قابلة للاشتعال - بما فيها البني ادميين - في دايرة نصف قطرها ٢ كيلو بقت فحمة

نسيت اقول ان تاريخ اليوم ده كان الاثنين ٦ اغسطس سنة ١٩٥٤ و المدينة كانت هيروشيما .. و اللي عمل كده هي ال ليتل بوي  زي الامريكان ما بيدلعوها
الصورة ده هي صورة للمدينة - اقصد اللي اتبقي منها - بعد المدبحة
 

و ده ساعة موجوده في متحف هيروشيما التذكاري للسلام تجمد اللحظة الرهيبة ده

شفت في المتحف صور و ظل لناس باقي علي الحجارة و الاسفلت و بقايا حاجات الناس في اللحظة ده كانت بتستخدمها و بقايا بني ادمين و حاجات فعلا تقطع القلب .. انا خرجت من المتحف و انا حاسس بخليط بالاسي

لسه المدينه محتفظة ببقايا المبني اللي اول صورة لحد اليوم علشان متنساش

ان فاتك الياباني مش هايرجع تاني

ده بقي عينات من الاكل الياباني اللي هري مصاريني طول الشهرين و نص اللي فاتو
بصوا كويس علي الشوربة اللي في اخر صورتين .. ايوه اللي في السلطانية .... هي دي بقي الميزو سوب اللي جه منها اسم المدونه
و الميزو سوب يا اخواني هي حساء الطحلب مضاف اليه مكعبات من جبنه زي الجبنه البيضا لكن طرية اوي بالاضافة الي دقيق رز علي قمح علي شويه عك كده .. هي صحيح كلههههههها بروتينات و مغذيه لكن طعمها .. اعععععععع بف بف بف شنييييع متقولش لعدوك عليه .. ولا اقولك قوله خليك تخلص و خلاص
مشكلة مشكلة .. مشكلة كبيرة لو انت في اليابان و مش بعترف تتكلم ياباني او معكش مترجم .. هتحوس حوسة الابل في عاصفة رملية علي راي عمنا محمود السعدني .. الجماعة اليابانين دول مبيعرفوش يتكلموا انجليزي اطلاقا و حتي اللي بيعرف بتكون لكنته مش حلوووة خالص .. مش فاهم انا مدارس ايه اللي بيروحوها ده .. لا و احنا بنقول التعليم عندنا بايض ال
لكن بجد الجماعة اليابانين دول مهذبين جدا .. لو دخلت اي محل هايهروك تحيات و سلامات و مرحبات .. و لو حبيت تسال علي حاجه (لو عرفت اصلا تتفاهم معاهم) تلاقيه و لا تلاقيها يجري يجبلك الحاجه او يسالك علي اللي انت عاوزه
من ساعت ما جيت مفتكرش اني شفت غير مره واحده  واحده ولا واحد مليان ولا "اوفر ويت" .. كلهم زي القمرين اللي في اول صورة ... عقبالنا يا رب


ده ميمنعش برضه ان عندهم حته كده جنان ... الصغيريين و الكبار .. الشبان و الشابات .. حتي العواجيز .. العمال و اساتذه الجامعات .. كلهم كلهم بيحبوا يقروا القصص المصورة (زي ميكي بتاعتنا كده بس حاجه ياباني) .. تلاقي مكتبات كبيرة و اخر شياكه و مبتبعش غير القصص ده (اسمها مانجا ..لا لا بتتقري بس Manga( .
و كمان كل الناس ده بتحب اوي تلعب حاجه زي الاتاري و الفيديو جيم بس بفلوس .. شوفوا حتي تاني صورة


علي العموم ربنا يشفيهم و يعدينا احنا شويه .. قولوا امين
كفايه كده احسن يرحلوني بعدين .. ايده ده .. ده صوت حد طالع علي السلالام .. هما عرفوا بسرعة كده .. اووووبسس

 


         

 

ها ها ها .. بتفكرني بنفسي يا اسمك ايه

شفت الباشا في محل اكسسوارات رجالي ... عجبني و ضحكت كتير .. قلت اشاركم معايا

 

يا سلام علينا

جانا الربيع

ده للشم بس محدش يقطف

يا اهلا بيكم

اهو بلوج و السلام